Danishkadah Danishkadah Danishkadah
حضرت امام علی نے فرمایا، جو شخص خدا کی اطاعت کو اپنا سرمایہ بنالیتا ہے، اُسے تجارت کے بغیر ہی ہر طرف سے منافع ملنے لگ جاتا ہے۔ غررالحکم حدیث3443
تینتیسویں دعا

33۔ دعائے استخارہ

بارالٰہا ! میں تیرے علم کے ذریعہ تجھ سے خیر و بہبود چاہتا ہوں ۔ تو محمد اور ان کی آل پر رحمت نازل کر اور میرے لیے اچھائی کا فیصلہ صادر فرما اور ہمارے دل میں اپنے فیصلہ (کی حکمت و مصلحت) کا القا کر اور اسے ایک ذریعہ قرار دے کہ ہم تیرے فیصلہ پر راضی رہیں اور تیرے حکم کے آگے سر تسلیم خم کریں ۔ اس طرح ہم سے شک کی خلش دور کر دے
اور مخلصین کا یقین ہمارے اندر پیدا کرکے ہمیں تقویت دے اور ہمیں خود ہمارے حوالے نہ کر دے کہ جو تو نے فیصلہ کیا ہے ا س کی معرفت سے عاجز رہیں اور تیری قدرو منزلت کوسبک سمجھیں اور جس چیز سے تیری رضا وابستہ ہے اسے ناپسند کریں اور جب چیز انجام کی خوبی سے دور اور عافیت کی ضد سے قریب ہو اس کی طرف مائل ہو جائیں۔
تیرے جس فیصلہ کو ہم ناپسند کریں وہ ہماری نظروں میں پسندیدہ بنا دے اور جسے ہم دشوار سمجھیں اسے ہمارے لیے سہل و آسان کر دے اور جس مشیت و ارادہ کو ہم سے متعلق کیا ہے اس کی اطاعت ہمادے دل میں القا کر ۔ یہاں تک کہ جس چیز میں تو نے تعجیل کی ہے اس میں تاخیر او ر جس میں تاخیر کی ہے اس میں تعجیل نہ چاہیں
اور جسے تو نے پسند کیا ہے اسے ناپسند اورجسے ناگوار سمجھا ہے اسے اختیار نہ کریں او ر ہمارے کاموں کا اس چیز پر خاتمہ کر جو انجام کے لحاظ سے پسندیدہ اور مآل کے اعتبار سے بہتر ہو۔ اس لیے کہ تو نفیس و پاکیزہ چیزیں عطا کرتا اور بڑی نعمتیں بخشتا ہے اور جو چاہتا ہے وہی کرتا ہے اور تو ہر چیز پر قدرت رکھتا ہے۔

 

 

 

فہرست صحیفہ کاملہ