اے اللہ!رحمت نازل فرما محمد اور ان کی آل پر اور مجھے اپنی عافیت کا لباس پہنا۔ اپنی عافیت کی ردا اوڑھا۔ اپنی عافیت کے ذریعہ محفوظ رکھ۔اپنی عافیت کے ذریعہ عزت و قار دے۔اپنی عافیت کے ذریعہ بے نیاز کر دے۔ اپنی عافیت کی بھیک میری جھولی میں ڈال دے۔ اپنی عافیت مجھے مرحمت فرما۔ اپنی عافیت کو میرا اوڑھنا بچھونا قرار دے۔ اپنی عافیت کی میرے لیے اصلاح و درستی فرما اور دنیا و آخرت میں میرے اور اپنی عافیت کے درمیان جدائی نہ ڈال۔

اے میرے معبود! رحمت نازل فرما محمد اور ان کی آل پر اور مجھے ایسی عافیت دے جو بے نیاز کرنے والی، شفا بخشنے والی (امراض کی دسترس سے) بالا اور روز افزوں ہو۔ ایسی عافیت جو میرے جسم میں دنیا و آخرت کی عافیت کو جنم دے اور صحت، امن، جسم و ایمان کی سلامتی، قلبی بصیرت، نفاذ امور کی صلاحیت، بیم و خوف کا جذبہ اور جس اطاعت کا حکم دیا ہے، اس کے بجا لانے کی قوت اور جن گناہوں سے منع کیا ہے، ان سے اجتناب کی توفیق بخش کر مجھ پر احسان فرما۔

بارالٰہا ! مجھ پر یہ احسان بھی فرما کہ جب تک تو مجھے زندہ رکھے، ہمیشہ، اس سال بھی اور ہر سال حج و عمرہ اور قبر رسول صلی اللہ علیہ وآلہ وسلم اور قبور آل رسول علیہم السلام کی زیارت کرتا رہوں اور ان عبادات کو مقبول و پسندیدہ ، قابل التفات اور اپنے ہاں ذخیرہ قرار دے اور حمد و شکر و ذکر اور ثنائے جمیل کے نغموں سے میری زبان کو گویا رکھ اور دینی ہدایتوں کے لیے میرے دل کی گرہیں کھول دے اور مجھے اور میری اولاد کو شیطان مردود اور زہریلے جانوروں، ہلاک کرنے والے حیوانوں اور دوسرے جانوروں کے گزند اور چشم بد سے پناہ دے اور ہر سرکش شیطان، ہر ظالم حکمران، ہر جمع جتھے والے مغرور، ہر کمزور اور طاقتور، ہر اعلےٰ و ادنےٰ، ہر چھوٹے بڑے اور ہر نزدیک اور دور والے اور جن وانس میں سے تیرے پیغمبر اور ان کے اہل بیت سے برسر پیکار ہونے والے اور ہر حیوان کے شر سے، جن پر تجھے تسلط حاصل ہے، محفوظ رکھ ۔ اس لیے کہ تو حق و عدل کی راہ پر ہے۔

اے اللہ ! محمد اوران کی آل پر رحمت ناز ل فرما اور جو مجھ سے برائی کرنا چاہے اسے مجھ سے ردگردان کر دے، اس کا مکر مجھ سے دور، اس کا اثر مجھ سے دفع کر دے اور اس کے مکر و فریب ( کے تیر) اسی کے سینے کی طرف پلٹا دے اور اس کے سامنے ایک دیوار کھڑی کر دے، یہاں تک کہ اس کے کانوں کو میرا ذکر سننے سے بہرا کر دے اور اس کے دل پر قفل چڑھا دے تاکہ میرا اسے خیال نہ آئے اور میرے بارے میں کچھ کہنے سننے سے اس کی زبان کو گنگ کر دے، اس کا سرکچل دے،اس کی عزت پامال کر دے، اس کی تمکنت کو توڑ دے۔ اس کی گردن میں ذلت کا طوق ڈال دے۔ اس کا تکبر ختم کرے اور مجھے اس کی ضرر رسائی، شر پسندی، طعنے زنی ، غیبت، عیب جوئی، حسد، دشمنی اور اس کے پھندوں، ہتھکنڈوں، پیادوں اور سواروں سے اپنے حفظ و امان میں رکھ۔ یقینا تو غلبہ و اقتدار کا مالک ہے۔