دانشکدہ | دانشکدہ اسلام کے آفاقی پیغام اور روشن تعلیمات کا فروغ

امام موسیٰ کاظم علیہ السلام جب بغداد میں پریشانی کی زندگی گزار رہے تھے تو ایک دن راستے سے گزر ہے تھے کہ ایک گھر کے اندر رقص کی محفل سجی ہوئی تھی اور گانے کی آواز باہر آرہی تھی اس وقت گھر کے دروازے سے ایک کنیز کوڑا کرکٹ پھینکنے کے لیے باہر آئی امامؑ نے اس سے پوچھا کہ یہ مکان کسی بندے کا ہے یا آزاد کا؟ اس نے فوراً جواب دیا کہ آزاد کا۔ آپؑ نے فرمایا کہ بے شک یہ آزاد ہے اگر بندہ ہوتا تو اپنے مالک کی اطاعت کرتا اور یہ کہہ کر آپؑ آگے بڑھ گئے۔

کنیز گھر کے اندر واپس گئی تو صاحب خانہ بشر نے تاخیر کا سبب پوچھا تو اس نے واقعہ بیان کیا بشر کے دل پر واقعہ کا اس قدر اثر ہوا کہ دوڑ کر امامؑ کی خدمت میں حاضر ہوا اس وقت اس کے پاؤں میں جوتے نہیں تھے اس نے امامؑ سے اپنے حرام عمل یعنی گانے اور رقص کرنے کی معافی مانگی تو امامؑ نے فرمایا تو خدا سے معافی طلب کر اور خدا تجھے معاف کر دے گا۔ اس نے خدا سے معافی طلب کی اور اللہ نے اس کو معاف کر دیا۔

اس واقعے کے بعد وہ گلیوں اور بازاروں میں ننگے پاؤں چلتا رہا اس نے کبھی بھی پاؤں میں جوتے نہ پہنے۔ بشر سے کسی نے پوچھا تو پاؤں میں جوتے کیوں نہیں پہنتا تو بشر نے جواب دیا: کہ اللہ تعالیٰ نے زمین کو بساطت اور فرش تعمیر کیا ہے اور بندے کی مجال نہیں ہے کہ مالک کے فرش پر جوتا پہن کر چلے اور وہ کہتا کہ کل میں نے خدا کے حضور امام موسیٰ کاظم علیہ السلام کے دربار میں معافی کی درخواست کی، تو اس وقت میرے پاؤں میں جوتے نہیں تھے اسی وجہ سے میں نے بعد میں جوتے پہننا پسند نہیں کیا۔